काठमाडौं । महिलाहरूको सुरक्षित, सहज र निःशुल्क आवागमन सुनिश्चित गर्ने उद्देश्यसहित बालेन्द्र (बालेन) शाह नेतृत्वको सरकारले साउन १ गतेदेखि काठमाडौं उपत्यकामा विशेष बस सेवा सञ्चालनमा ल्याउने भएको छ। सरकारले पहिलो चरणमा ८ वटा बसबाट सेवा सुरु गर्ने तयारी गरेको जनाएको छ। महिला यात्रुहरूको दैनिक आवतजावतलाई सहज बनाउने, सार्वजनिक यातायातमा हुने असुरक्षा र दुर्व्यवहारका घटनालाई न्यूनीकरण गर्ने तथा रोजगारी, शिक्षा र स्वास्थ्य सेवामा पहुँच बढाउने लक्ष्यका साथ यो कार्यक्रम लागू गर्न लागिएको सरकारको भनाइ छ।
सरकारका अनुसार प्रारम्भिक चरणमा सञ्चालन गरिने बस सेवाको प्रभावकारिता, यात्रु चाप र व्यवस्थापनको मूल्याङ्कन गर्दै क्रमशः बसको संख्या १२५ पुर्याइने योजना छ। बसहरू आधुनिक सुविधा, सीसीटीभी क्यामेरा, जीपीएस ट्र्याकिङ, आपत्कालीन सहायता प्रणाली तथा महिला-मैत्री सेवासहित सञ्चालन गरिने तयारी भइरहेको जनाइएको छ। सेवा सञ्चालनका लागि आवश्यक रुट निर्धारण, चालक तथा सहचालकको व्यवस्थापन, टिकट प्रणाली र सञ्चालन मापदण्डसमेत अन्तिम चरणमा पुगेको बताइएको छ।
सरकारले यो सेवा काठमाडौं उपत्यकामा सफल कार्यान्वयन भएपछि देशका अन्य प्रदेशहरूमा पनि विस्तार गर्ने दीर्घकालीन योजना अघि सारेको छ। विशेषगरी शहरी क्षेत्रमा महिला यात्रुहरूको सुरक्षित सार्वजनिक यातायातको पहुँच सुनिश्चित गर्दै लैङ्गिक समानता प्रवर्द्धन गर्ने उद्देश्य सरकारको रहेको बताइएको छ। यस कार्यक्रमले महिलाहरूको सार्वजनिक यातायातप्रतिको विश्वास बढ्नुका साथै आर्थिक भार घट्ने र दैनिक यात्रा थप सुरक्षित तथा सहज हुने अपेक्षा गरिएको छ।