यात्रुहरुबिच हानाहान

 

 चैत २४ । बुधबार अपरान्ह ४ः३० बजे विराटनगरबाट काठमाडौँका लागि उडेको बुद्ध एयरको जहाजभित्र दुइ यात्रुबीच हानाहान भएको घटना बाहिर आएको छ । बुद्धको जहाज उडिरहेका बेला सँगै बसेका दुई यात्रु दुर्गालाल श्रेष्ठ र विमलबाबु श्रेष्ठबीच झगडा भएको हो ।

उडिरहेको जहाजभित्र हानाहान गर्ने दुबैलाई अहिले महानगरीय प्रहरी वृत्त गौशलाले नियन्त्रणमा लिएको छ । उनीहरुलाई त्रिभुवन विमानस्थल कार्यालयले प्रहरीको जिम्मा लगाएको हो ।

जहाज उडिरहेको बेला दुइ यात्रुले एकअर्कालाई भनाभन गरेको र मुक्कासमेत हानाहान गरेको भन्दै पाइलटले नागरिक उड्ययन प्राधिकरणमा समेत जानकारी गराएका थिए । यसपछि ती यात्रुहरुलाई गैरसैनिक हवाई ऐन २०१५ र नागरिक उड्डयन सुरक्षा नियमावली अनुसार कारबाही अगाडि बढाइएको क्यान स्रोतले जनाएको छ ।

‘एकआपसबीच मनमुटाव भएपछि दुई यात्रुबीच हात हालाहाल भएको रहेछ, उडानकै क्रममा यस्तो घटना हुनु भनेको दुर्घटनाको जोखिम हुनु हो’ क्यान स्रोतले भन्यो, ‘अब प्रहरी अनुसन्धानबाट केही खुल्छ होला ।’